( ياهل الركاب )
ياهل الركاب اللي تعلّن على الريع
تريضوا واللي ورى الريع قاعي
ياما تعلّن فوق روس المطاليع
قدامكم شهب السباع الجياعي
ماحصلن باللي هقن به مطاميع
لا خيب الله مبعدين المساعي
نركض ورى الدنيا سوات المفازيع
لو ان نص الركض من دون داعي
ياما غفل راع الذهب والمشاريع
حتى خرج منها بليا متاعي
من عاند الدنيا يجي يوم ويطيع
وتضيق فيه الارض عقب اتساعي
تغانموا نبت الزهر بالمرابيع
ما كل ساعه يخضرا المراعي
وخذوا من الحلو المصفى قراطيع
ياسرع دورات الزمن والوداعي
واخر كلامي فيه بصمة وتوقيع
ليه وانا اللي نجدتي من ذراعي
من كثر ما مرت علي المواضيع
خرجت في مضون وقف النزاعي
ادرى رفيقك يابعيد المراميع
على الرفاقه لا تصير اندفاعي
لابد ما تشري معه يوم وتبيع
عملة ذهب واللي شرى منك باعي
حتى عدوك فيه بعض المنافيع
تاخذ عبر ودروس لو كنت واعي
ما تدري ان احسن دوى للمواجيع
يستخلصونه من سموم الافاعي
شعر صالح محسن العروي
ليست هناك تعليقات:
إرسال تعليق